Інстытут філасофіі НАН Беларусі стаў суарганізатарам навукова-практычнай канферэнцыі ў Чувашскай Рэспубліцы
Sorry, this entry is only available in Беларуская and Russian. For the sake of viewer convenience, the content is shown below in one of the available alternative languages. You may click one of the links to switch the site language to another available language.
Інстытут філасофіі НАН Беларусі стаў афіцыйным суарганізатарам Х Міжнароднай навукова-практычнай канферэнцыі «Культура і мастацтва: традыцыі і сучаснасць», якая 17 лютага 2022 года адбылася ў Чувашскай Рэспубліцы.
Навуковую імпрэзу ў Чэбаксарах арганізацыйна курыруе кафедра народнай мастацкай творчасці Чувашскага дзяржаўнага інстытута культуры і мастацтваў (Чэбаксары, Чувашская Рэспубліка Расійскай Федэрацыі). Каардынатарам, мадэратарам канферэнцыі і сёлета з’яўлялася яе загадчыца Раіса Міхайлаўна Васільева. Аддзел філасофіі літаратуры і эстэтыкі Інстытута філасофіі НАН Беларусі арганізаваў работу асобнай секцыі канферэнцыі — «Нематэрыяльная культурная спадчына і нацыянальная мастацкая традыцыя ў XXI стагоддзі», дзе свае даклады агучылі прадстаўнікі аддзела — Валерый Максімовіч, Вячаслаў Калацэй, Таццяна Карнажыцкая, Марыя Вярэніч, а таксама каля 15 беларускіх даследчыкаў, запрошаных з іншых устаноў Мінска. Такім чынам, Інстытут філасофіі НАН Беларусі стаў афіцыйным суарганізатарам канферэнцыі, што павінна спрыяць далейшаму ўпарадкаванню навуковых сувязей паміж даследчыкамі-гуманітарыямі Беларусі і Чувашыі.
Мерапрыемства аб’яднала даследчыя і навучальныя ўстановы Чувашыі, іншых рэгіёнаў Расіі, Эстоніі, Казахстана, Беларусі, Малдовы і Турцыі. На пленарным і секцыйным пасяджэннях канферэнцыі заслухоўваліся даклады, якія датычыліся як агульна-тэарэтычных праблем сучаснай гуманітарыстыкі і антрапалогіі, так і практычна арыентаваныя, звязаныя з захаваннем традыцый этнічнай спадчыны ў музыцы, літаратуры, мастацкай творчасці. Усе пытанні разглядаліся ў кантэксце сучасных парадыгм развіцця культуры.
