У Нацыянальным мастацкім музеі прайшла першая з серыі лекцый па этнафіласофіі беларусаў
Sorry, this entry is only available in Беларуская and Russian. For the sake of viewer convenience, the content is shown below in one of the available alternative languages. You may click one of the links to switch the site language to another available language.
5 лютага 2023 г.у Нацыянальным мастацкім музеі Рэспублікі Беларусь у рамках праекта Інстытута філасофіі НАН Беларусі «Навука мастацтва і мастацтва навукі» прайшло адкрыццё цыкла лекцый старшага навуковага супрацоўніка Інстытута філасофіі НАН Беларусі Ірыны Дубянецкай на тэму «Этнафіласофія і беларускія культурныя коды».
Першая лекцыя з цыкла была прысвечана тэме «Традыцыйнае светамысленне беларусаў і этнафіласофія як самарэфлексія беларускай культуры».
Мерапрыемства было ўрачыста адкрыта прывітаннем і музычным нумарам у выкананні Кацярыны Пукст, дацэнта кафедры струнных смычковых інструментаў, і Наталлі Сазановіч, загадчыцы кафедры сацыяльна-гуманітарных дысцыплін, дацэнта кафедры фартэпіяна Беларускай дзяржаўнай акадэміі музыкі.
Наведвальнікі лекцыі змаглі азнаёміцца з унікальным праектам Інстытута філасофіі «Беларуская этнафіласофія ў сістэме культуры», яго мэтамі і задачамі, разгледзець асаблівасці гэтага падыходу, як ён даследуе і сістэматызуе ўвесь комплекс уяўленняў аб свеце традыцыйнай супольнасці (у нашым выпадку беларускай), рэканструюе і асэнсоўвае духоўна-інтэлектуальную прастору беларусаў. Слухачы змаглі зірнуць на беларускую традыцыйную культуру ў часовым і прасторавым кантэксце, даведацца аб эстэтычнай і навуковай каштоўнасці беларускага фальклорнага матэрыялу, аб значэнні, месцы і функцыі традыцыйнай культуры ў сучасным высокатэхналагічным свеце. Таксама ім было прапанавана азнаёміцца з першымі пладамі акадэмічнага праекта этнафіласофскіх даследаванняў на прыкладзе кнігі Трошкі бліжэй да Сонца, трошкі далей ад Месяца: беларуская народная філасофія / Т. В. Валодзіна [і інш.] ; уклад. і агул. рэд.: І. М. Дубянецкая, С. І. Санько ; Нац. акад. навук Беларусі, Ін-т філасофіі. – Мінск : Беларуская навука, 2021. – 481 с.
У заключнай частцы мерапрыемства наведвальнікі змаглі пагутарыць з лектарам і атрымаць адказы на пытанні, якія іх цікавяць.
Лекцыя выклікала вялікую цікавасць – яе наведала больш за 150 чалавек. У адрас лектара і арганізатараў паступіла шмат водгукаў, падзяк і пажаданняў аб далейшым правядзенні падобных інтэлектуальных і культурных сустрэч.
Правядзенне наступнай лекцыі з цыклу запланавана на канец лютага. Па любых пытаннях, што тычацца праекта і ўдзелу ў ім можна звяртацца да куратара – Даронінай Святланы Генадзеўны па тэл: +375-25-9789074 або e-mail: svetadoris@mail.ru
Фота: Дзмітрый Шыйка
Відэа: Алена Асташэвіч
Gallery
