Дырэктар Інстытута філасофіі Анатолій Лазарэвіч прыняў удзел у XXІV Сусветным філасофскім кангрэсе
Sorry, this entry is only available in Беларуская and Russian. For the sake of viewer convenience, the content is shown below in one of the available alternative languages. You may click one of the links to switch the site language to another available language.
З 13 па 20 жніўня 2018 г. дырэктар Інстытута філасофіі НАН Беларусі Анатолій Аркадзьевіч Лазарэвіч прыняў удзел у XXІV Сусветным філасофскім кангрэсе, які прайшоў у Пекіне (КНР). Філасофскія форумы такога высокага ўзроўню праводзяцца раз у пяць гадоў пад эгідай Сусветнай федэрацыі філасофскіх таварыстваў у адной з краін свету, вядомых сваімі традыцыямі і дасягненнямі ў галіне філасофіі. У кангрэсе прынялі ўдзел больш за чатыры тысячы чалавек, якія прадстаўляюць навуковыя, грамадскія, гуманітарныя, культурныя і іншыя арганізацыі і ўстановы.
Праграма кангрэса была прадстаўлена пяццю тэматычнымі пленарнымі сесіямі, прысвечанымі розным пытанням: духоўнасць у яе сучасным чытанні; свядомасць і самасвядомасць чалавека, яго свабода, адказнасць, захаванне асобаснай ідэнтычнасці; спецыфіка фарміравання камунікатыўнай сацыяльнасці (сям’я, карпарацыя, супольнасць, чалавецтва) у прасторы сучасных выклікаў і пагроз; ўзаемадзеянне свету чалавека і свету прыроды; роля традыцый у інавацыйнай дынаміке культуры. Навукова-дыскурсыўнай асновай кангрэса стала праца дзесяці сімпозіумаў, амаль сотні спецыяльных секцый, больш чым ста круглых сталоў, некалькіх дзесяткаў запрошаных сесій, на якіх навукоўцы з Азіі, Амерыкі, Аўстраліі, Афрыкі і Еўропы мелі магчымасць абмеркаваць розныя праблемы сучаснасці, сярод якіх можна вылучыць наступныя: нацыяналізм і глабальны ўніверсалізм, сацыяльна-эканамічны прагматызм і ўстойлівае развіццё, асаблівасці лацінаамерыканскага, афрыканскага або еўрапейскага разумення гуманнасці, сувязь свядомасці, цялеснасці і эмоцый, межы навукова-тэхнічнага прагрэсу і інш. Акрамя таго ў рамках кангрэса былі прачытаны лекцыі, прысвечаныя кітайскім і еўрапейскім мысліцелям.
Пад эгідай расійскага і беларускага філасофскіх таварыстваў была арганізавана запрошаная сесія «Глабальны свет: сутыкненне інтарэсаў», круглы стол «Еўразійская філасофія: традыцыі, сучаснасць і будучыня», а таксама асобная канферэнцыя ў сценах Інстытута філасофіі Кітайскай акадэміі грамадскіх навук, прысвечаная праблемам развіцця нацыянальнай філасофіі . Дадзеныя мерапрыемствы з’явіліся добрай пляцоўкай для папулярызацыі дасягненняў айчыннай філасофскай думкі, абмеркавання ключавых праблем сучаснасці, пастаўленых у тым ліку і ў час працы Першага беларускага філасофскага кангрэса ў канцы мінулага года.
Дырэктар Інстытута філасофіі НАН Беларусі Лазарэвіч А.А. правёў перамовы з шэрагам навукоўцаў і навуковых дэлегацый з Расіі, Казахстана, Азербайджана, Кітая, Японіі, ЗША, Італіі, Чэхіі, Нарвегіі. Прадметам перамоваў з’явілася паглыбленне раней устаноўленых і развіццё існуючых навуковых сувязяў паміж Інстытутам філасофіі НАН Беларусі, Беларускім філасофскім грамадствам і замежнымі навукоўцамі, навуковымі арганізацыямі з мэтай папулярызацыі айчыннай філасофскай навукі, падрыхтоўкі сумесных даследчых праектаў па актуальных праблемах сучаснага сацыяльна-гуманітарнага развіцця.
Gallery
